Áleýmettik jelide til janashyry Rýza Beısenbaıteginiń psıhologıalyq ortalyqqa kúshtep jatqyzylǵany týraly aqparat taraǵan edi. Qamshy.kz aqparat agenttigi atalǵan aqparatty naqtylaý úshin Pavlodar oblysy densaýlyq saqtaý basqarmasyna habarlasty. Basqarmanyń baspasóz hatshysy bul aqparatty rastap otyr. 

"Aqparatty rastaımyz. Naýqas Pavlodar oblystyq psıhıkalyq densaýlyq ortalyǵyna 24 qańtar kúni saǵat 16.30-da túsken. Ózge málimetter “Halyq densaýlyǵy jáne densaýlyq saqtaý júıesi týraly» Kodekstiniń 273-babynyń negizinde jarıa etilmeıdi. Bul – dárigerlik qupıa. Qazir sebebin aıtatyn bolsaq ol kisi bizdi sotqa berýi múmkin", dedi basqarma ókili. 

Rýza Beısenbaıteginiń aýrýhanaǵa túskeni týraly aqparatty Abzal Dostıar habarlaǵan edi. 

"Shuǵyl! Til janashyry, kúresker anamyz aýrýhanaǵa tústi! Búgin tústen keıin Rýza apaı habarlasyp: "Abzal balam, men sotqa ketip bara jatyrmyn, bir dámhananyń ıesi til máselesine baılanysty sotqa beripti, kelgen soń habarlasamyn.  Qazir ǵana belgili bolǵandaı Rýza Beısenbaıtegin jedel-járdem kóligimen alyp ketipti, alyp ketkenge deıin ol kisini polısıa qyzmetkerleri qorshap turǵan eken. Sol sáttegi tikeleı efır saqtalmapty, apaıdyń ózine qońyraý shalsam, telefonyn kótermeı tur", dep jazdy belsendi óziniń feısbýk paraqshasyna. 

Rýza Beısenbaıtegi Kerekýdegi til janashyry retinde tanymal. Ol oblystaǵy birneshe jyldan beri memlekettik tildi mensinbeıtindermen kúresip keledi.